કેરળના રમત મંત્રી મેસ્સીનું આવવાનું નક્કી હોવાનું જણાવ્યું

આર્જેન્ટિનાની ફૂટબોલ ટીમ ભારત આવશે, સ્પોન્સર્સે મેચ ફી ચૂકવી દીધી: કેરળના મંત્રી
તિરુવનંતપુરમ – કેરળના રમતગમત મંત્રી વી. અબ્દુરહિમાને કહ્યું છે કે સ્ટાર ફૂટબોલર લિયોનેલ મેસ્સીના નેતૃત્વ હેઠળની આર્જેન્ટિનાની ટીમ ભારત આવશે તે નિશ્ચિત છે. તેમણે જણાવ્યું કે સ્પોન્સર્સે આ ઇવેન્ટ માટે મેચ ફી પણ જમા કરાવી દીધી છે. કેટલાક મીડિયા રિપોર્ટ્સમાં આવી ખબર હતી કે આર્જેન્ટિનાની ટીમે ઓક્ટોબર-નવેમ્બરમાં કેરળનો તેનો નિર્ધારિત પ્રવાસ રદ કર્યો છે કારણ કે સ્પોન્સર્સે કરારની શરતોનું ઉલ્લંઘન કર્યું છે.
અબ્દુરહિમાને ગયા વર્ષે નવેમ્બરમાં જાહેરાત કરી હતી કે આર્જેન્ટિનાની ટીમ કેરળનો પ્રવાસ કરશે. એટલું જ નહીં, તે કોચીમાં 2 ફ્રેન્ડલી મેચ પણ રમશે.
કેરળના રમતગમત મંત્રીએ કહ્યું-
*"સ્પોન્સર્સ દ્વારા મેચ ફી ચૂકવવામાં થોડો વિલંબ થયો હતો. હવે આ મામલો ઉકેલાઈ ગયો છે. FIFA વિન્ડો મુજબ, વિશ્વભરની ટીમને ઓક્ટોબર-નવેમ્બરમાં આવી ઇવેન્ટ્સમાં ભાગ લેવા માટે સમય ફાળવવામાં આવે છે. તેથી અમારા માટે પણ તે જ સમય નક્કી કરવામાં આવે તેવી શક્યતા છે. પ્રસ્તાવિત ફ્રેન્ડલી મેચ અહીં ગ્રીનફિલ્ડ સ્ટેડિયમ ખાતે યોજાવાની શક્યતા છે. કારણ કે તે આંતરરાષ્ટ્રીય ધોરણની છે."
મેસ્સી 14 વર્ષ પછી ભારતમાં ફ્રેન્ડલી મેચ રમવા આવી શકે – લિયોનેલ મેસ્સી 14 વર્ષ પછી ભારતમાં ફ્રેન્ડલી મેચ રમવા આવી શકે છે. આ પહેલા મેસ્સીએ 2011માં ભારતની મુલાકાત લીધી હતી, ત્યારે આર્જેન્ટિનાએ કોલકાતાના સોલ્ટ લેક સ્ટેડિયમમાં વેનેઝુએલા સામે વર્લ્ડ કપ ક્વોલિફિકેશન મેચ રમી હતી.
આર્જેન્ટિનાએ 2026 વર્લ્ડ કપ માટે ક્વોલિફાય કર્યું – 26 માર્ચે બ્રાઝિલને 4-1થી હરાવીને આર્જેન્ટિનાએ 2026ના વર્લ્ડ કપ માટે ક્વોલિફાય કર્યું હતું. લિયોનેલ મેસ્સી આ મેચમાં રમ્યો ન હતો. બ્યુનોસ એયર્સમાં રમાયેલી આ મેચમાં આર્જેન્ટિના તરફથી જુલિયન અલ્વારેઝ, એન્ઝો ફર્નાન્ડીઝ, એલેક્સિસ મેક એલિસ્ટર અને ગુલિયાનો સિમોને ગોલ કર્યા હતા. બ્રાઝિલ તરફથી મેથ્યુસ કુન્હાએ એકમાત્ર ગોલ કર્યો હતો.
આર્જેન્ટિનાની ટીમ ફૂટબોલની વર્લ્ડ ચેમ્પિયન, 36 વર્ષ પછી ટાઇટલ જીત્યું – આર્જેન્ટિનાની ટીમ ફૂટબોલની વર્લ્ડ ચેમ્પિયન છે. ટીમે 2022માં પેનલ્ટી શૂટઆઉટમાં ફ્રાન્સને 4-2 થી હરાવીને ટાઇટલ જીત્યું હતું. બંને ટીમ 90 મિનિટ સુધી 2-2 થી બરાબરી પર રહી હતી.
એક્સ્ટ્રા ટાઇમ પછી મેચ 3-3 થી બરાબરી પર રહી. આ પછી, પેનલ્ટી શૂટઆઉટ દ્વારા નિર્ણય લેવામાં આવ્યો. મેસ્સીએ ફાઈનલમાં બે ગોલ કર્યા. જ્યારે, ફ્રાન્સ માટે કાયલિયન એમબાપ્પેએ હેટ્રિક ફટકારી.
આર્જેન્ટિનાએ 36 વર્ષ પછી ફૂટબોલ વર્લ્ડ કપ જીત્યો. 1986માં ટીમ વર્લ્ડ કપમાં ચેમ્પિયન બની હતી. 1978માં આર્જેન્ટિના પહેલી વાર વર્લ્ડ ચેમ્પિયન બન્યું હતું.

Reference