આંગણવાડી પાસે ગંદકીના ઢગ થઈ ગયા
ચબુતરા ચોક અને બેંકમાં પાણી ભરાયું, જાહેર શૌચાલયની સ્થિતિ ખરાબ, દુર્ગંધથી સ્થાનિકો પરેશાન
માંડલ – માંડલ પંથકમાં કેટલાક દિવસથી વરસાદી વાતાવરણ છે અને શહેરમાં રવિવાર અને સોમવારે કેટલાક સમય માટે વરસાદ પણ પડ્યો હતો. આથી શહેરના કેટલાક વિસ્તારોમાં કાદવ અને કીચડનું રાજ કાયમ છે.
ચબુતરા ચોકમાં નાગરિક બેંક જવાના રસ્તા પર પેવરબ્લોક ન હોવાના કારણે ભારે કાદવ અને કીચડ જોવા મળ્યું છે. જેના કારણે બેંકના કર્મચારીઓ અને ગ્રાહકોને મુશ્કેલી થઈ રહી છે. આ વિસ્તારમાં આવેલી આંગણવાડીની પાસે બે વર્ષ પહેલાં પેવરબ્લોકનું કામ થયું હતું, તેમ છતાં અહીં હવે ભારે માત્રામાં કચરો એકઠો થઈ ગયો છે અને વરસાદે તેને વધુ ઘાણી દીધો છે.
એસ.બી.આઈ. બેંકની સામે આવેલા જાહેર શૌચાલયમાંથી દુર્ગંધ આવી રહી છે જેનાથી આસપાસના દુકાનદારો પરેશાન થઈ રહ્યા છે. વળી, જાહેર શૌચાલયના બારણાં તૂટી ગયાં છે જેના કારણે રસ્તા પરથી પસાર થતી મહિલાઓ અને યુવાનોને શરમનો અનુભવ થાય છે. આગામી સમયમાં વરસાદની સીઝન આવી રહી છે, ત્યારે શહેરની સફાઈ, શૌચાલયો અને બેંકોની આસપાસની ગંદકી દૂર કરવા માટે સ્થાનિકો માંગ કરી રહ્યા છે.
