જાફરાબાદ: ખેડૂતોએ જાતે બનાવવાનું શરૂ કર્યું રોડ
જાફરાબાદ, 2 ઓક્ટોબર 2024: જાફરાબાદ તાલુકાના માણસા અને જામકા ગામના લોકો સરકારી તંત્રની બેદરકારીનો ભોગ બન્યા છે. સરકારે માણસાથી જામકા જતો રોડ મંજૂર કર્યો હતો અને કોન્ટ્રાક્ટરે કામ પણ શરૂ કર્યું હતું, પરંતુ આખરે રોડ બનાવવાનું કામ ખેડૂતોએ જ કરવાનું રહ્યું. કારણ કે, સરકારે જે કોન્ટ્રાક્ટરને રોડ બનાવવાનું કામ આપ્યું હતું તે રોડ અધૂરો મૂકીને જતો રહ્યો. આના કારણે ચોમાસામાં લોકોને ભારે હાલાકી પડી રહી છે. આખરે ખેડૂતોએ ‘અપના હાથ જગન્નાથ’ના સૂત્રને અપનાવી જાતે જ રોડ બનાવવાનું શરૂ કર્યું છે.
ખેડૂતોએ જાતે શરૂ કર્યું રોડનું સમારકામ
સરકારે અંબિકા કન્સ્ટ્રક્શનને રોડનું કામ સોંપ્યું હતું. પરંતુ અંબિકા કન્સ્ટ્રક્શન રોડનું કામ અધૂરું મૂકીને જતાં રહેતા સ્થાનિક ખેડૂતોએ અવારનવાર અંબિકા કન્સ્ટ્રક્શન અને એસ.ઓ.ને અનેક વખત રજૂઆત કરી. તેમ છતાં રોડની કામગીરી પૂર્ણ કરાઈ ન હતી. અંતે ખેડૂતો ખેતીનું કામ પડતું મૂકીને સ્વખર્ચે રોડનું સમારકામ કરવા મજબૂર બન્યા.
80 ખેડૂતો બનાવી રહ્યા છે 70 મીટરનો રોડ
ખેડૂતો દ્વારા છેલ્લા એક મહિનાથી અનેક વખત અંબિકા કન્સ્ટ્રક્શન સહિત અધિકારીઓને રજૂઆત કરતાં ફક્ત આશ્વાસન જ આપવામાં આવતું હતું. આ દરમિયાન ચોમાસાની સિઝનમાં ખેડૂતોને ખેતરે જવા માટે મુશ્કેલી ભોગવવી પડતી હોવાથી અંતે ખેડૂતોએ કંટાળીને સ્વખર્ચે રોડના રિસરફેસિંગની કામગીરી હાથ ધરી છે. જેમાં 80 ખેડૂતોએ એકઠા થઈને 70 મીટરનો રોડ બનાવવાની કવાયત શરૂ કરી છે.
અધિકારીઓ-કોન્ટ્રાક્ટરની મિલીભગતનો આક્ષેપ
સમગ્ર મામલે ખેડૂતોએ અંબિકા કન્સ્ટ્રક્શન અને અધિકારીઓની મિલીભગત હોવાના આક્ષેપ કર્યા છે. જ્યારે વહેલી તકે રોડની કામગીરી પૂર્ણ કરવામાં આવે તેવી ખેડૂતો માંગ કરી રહ્યા છે.
