ફિલ્મોના પોસ્ટર પરથી પાકિસ્તાની કલાકારોની તસવીરો દૂર
– કવર આલ્બમો પરથી થમ્બનેઈલ હટાવાયા
– ઓપરેશન સિંદૂર વિરોધી ટિપ્પણીઓ બાદ ફિલ્મ મ્યુઝિક કંપનીઓનું પગલું
મુંબઇ : ભારત અને પાકિસ્તાન વચ્ચે ચાલી રહેલા તાણ વચ્ચે, પાકિસ્તાની કલાકારો માહિરા ખાન અને ફવાદ ખાનની તસવીરો તેમની બોલીવૂડ ફિલ્મોના ગીતોના પોસ્ટર પરથી દૂર કરવામાં આવી છે. કવર આલ્બમો પરથી તેમની થમ્બનેઈલ હટાવી લેવાયા છે.
ફવાદ ખાને ‘કપૂર એન્ડ સન્સ’ અને માહિરા ખાને ‘રઇસ’ ફિલ્મમાં કામ કર્યું હતું. ભારત અને પાકિસ્તાન વચ્ચે ચાલી રહેલા વિવાદ દરમિયાન તેમણે ભારતીય સરકાર અને ભારતીય સેના વિરુધ્ધ અપમાનજનક ટીપ્પણીઓ કરી હતી. આથી, મ્યુઝિક એપ્સ પરના ગીતોના પોસ્ટર પરથી તેમની તસવીરો હટાવી લેવામાં આવી છે. થોડા દિવસો પહેલા જ ‘સનમ તેરી કસમ’ આલ્બમ કવર પરથી માહિરા ખાનની તસવીર પણ દૂર કરવામાં આવી હતી. પરંતુ સોનમ કપૂરની ‘ખૂબસૂરત’ના પોસ્ટર પરથી ફવાદ ખાનની તસવીરો હજુ દૂર કરવામાં આવી નથી.
‘રઈસ’ના પોસ્ટર પર માહિરા ખાન અને શાહરૂખ ખાન બંને જોવા મળતા હતા. પરંતુ હવે ફક્ત શાહરુખ જ જોવા મળે છે. ફવાદ ખાને ફિલ્માયેલાં ‘કપૂર એન્ડ સન્સ’ના કેટલાંક ગીતોના વિડીયો પણ દૂર કરી દેવાયા છે. આગામી દિવસોમાં વધુ પાકિસ્તાની કલાકારોની તસવીરો હટાવવામાં આવે તેવી શક્યતા છે.
