ત્રણ યુવકોને પોક્સો એક્ટ હેઠળ સજા ફટકારવામાં આવી છે. ગાંધીનગરની સ્પેશિયલ પોક્સો કોર્ટે આ કેસમાં ત્રણેય આરોપીઓને તકસીરવાન ઠેરવી ત્રણ વર્ષની કેદ અને કુલ 15 હજારનો દંડ ફટકાર્યો છે.
ઘટના વર્ષ 2022ની છે. માણસાના અંબોડ ગામની 15 વર્ષીય સગીરા ધોરણ-10ની વાર્ષિક પરીક્ષા આપીને બહેનપણી સાથે ઘરે પરત ફરી રહી હતી. માણસા સિવિલ હોસ્પિટલ નજીક વડ પાસે એક યુવકે તેને અટકાવી હાથ પકડી લીધો હતો. તેણે સગીરાને મોબાઈલ નંબર લખેલી ચિઠ્ઠી આપી ફોન કરવાનું કહ્યું હતું.
આ ઘટના અન્ય વિદ્યાર્થીઓએ જોઈ હતી. એક વિદ્યાર્થીએ સગીરાના ભાઈને જાણ કરી. સગીરાનો સગો-પિતરાઈ ભાઈ સિવિલ હોસ્પિટલ પહોંચ્યો હતો. થોડી વારમાં ચિઠ્ઠી આપનાર શખ્સ તેના બે મિત્રો સાથે લોખંડની પાઈપ, લાકડી અને પંચ જેવા હથિયારો સાથે આવ્યો હતો. ત્રણેય શખ્સોએ સગીરાના બંને ભાઈઓ પર હુમલો કર્યો હતો.
આરોપીઓની ઓળખ નીકુલ શંકરભાઈ રાવળ, શૈલેષજી કુવરજી લુહાર (બંને માણસા, મલાઈ તળાવ પાસે રહેવાસી) અને કનુજી વિષ્ણુજી ઠાકોર (માણસા, વાવ દરવાજા) તરીકે થઈ હતી. માણસા પોલીસે મારામારી અને પોક્સો એક્ટ હેઠળ કેસ નોંધ્યો હતો. ગાંધીનગરની સ્પેશ્યલ પોક્સો કોર્ટના જજ પી.એમ. ઉનડકટે સરકારી વકીલ સુનિલ એસ પંડ્યાની દલીલો ગ્રાહ્ય રાખી સજા ફટકારી છે.
